專劏升班球隊 紐卡素信心爆棚恰高地_東方日報

今輪英超壓軸尾場，高雲地利主場硬撼紐卡素。雖然高地上輪終於開齋，但表現唔算標青，「喜鵲」對親升班球隊分外有計，今仗有力反客為主，客勝咪錯過。（Now 621周二凌晨3時直播）文:法達斯維

專劏升班球隊
今季重返英超嘅高地，開咧後頭4輪聯賽輸晒，仲要狂失10粒兼冇波入，好彩上輪靠耶蘭耶偷襲得手，作客贏諾定咸森林1比0，取得佢哋相隔25年之來首場英超勝仗，總算保住林柏特嘅帥位，但查實睇番成場波森林踢得堅曳，VAR又吹走伊戈捷西斯嘅入波，高地靠將士用命死守到尾贏波，表現唔算特別好。

另邊廂，紐卡素經過今夏大動盪，安東尼哥頓、辛度東拿利、般奴古馬雷斯等主力離隊，加上簽入費蘭迪斯柏度等多名新兵，仲有排執，但從各項賽事近6仗取得4勝1和1負，早前受傷嘅防中尼高干沙利斯亦可候命，總算捱過最艱難時期。何況「喜鵲」專恰升班球隊，近4次聯賽對升班球隊，取得3勝1負，包括上輪以2比1擊敗同樣今季先升班、一度位居前列嘅侯城，打破對手不敗身，信心爆棚，絕對唔赦高地，客勝要捧。