列斯聯遇強腳仔軟 阿仙奴趕開攻速破列斯_東方日報

英超早場，阿仙奴主場迎戰列斯聯。「兵工廠」雖然有夏維斯受傷，但搵約基利斯做正選仲正，佢上季兩循環鬥列斯聯都有波入，堪稱「私房菜」，加上近8次交手全勝之餘，當中近6次更全部半場領先，半場主勝穩開。（Now 621及611周六晚7時30分直播）文:渡邊年

國際賽期對阿仙奴好壞參半，夏維斯同謝索利斯受傷梗係壞消息，但球隊又可以藉呢段時間過一過冷河，將作客0比3不敵白禮頓嘅陰霾掃去。

「兵工廠」板櫈深度十足，冇夏維斯仲有約基利斯，呢名瑞典國腳喺歐國聯上陣4場全部有波入，而且佢上季聯賽兩鬥列斯聯入3球，當中包括上季來投阿仙奴嘅開齋波。此外，西班牙中場米基爾馬連奴亦有貨交，後備入替之下為「狂牛兵」連入2球反勝克羅地亞，加埋布卡約沙卡及馬田奧迪加特等，阿仙奴攻力唔成問題。

列斯聯遇強腳仔軟
列斯聯紙上賽績唔錯，喺英超保持不敗，但實際只得2勝3和，而且仲未對過傳統ＢＩＧ 6，早前英聯盃鬥車路士就露晒餡，作客大敗3比6。列斯聯前面主要靠卡維特利雲食胡，但呢名前愛華頓射手之前9次面對阿仙奴仲未入過波，今場相信都難破宿命。事實上，阿仙奴往績輾壓列斯聯，近8次交手全勝之餘，當中近6次全部半場領先，料列斯聯今場好難頂得住「兵工廠」，半場主勝好快收錢。