谷底反彈後超穩定 高士路主場全力爭聖_東方日報

周四朝早巴甲連場大戰，重頭戲有高士路主場對聖保羅。高士路要爭奪下屆自由盃入場券，上場3比1反勝維多利亞，軍心大受鼓舞，今仗返主場肯定乘勝追擊，對住內憂外患嘅聖保羅，有望大打落水狗，主勝值得捧場。（周四早上8時30分開賽）文:工廠仔

高士路擺脫災難開季後，喺巴甲表現一直好穩定，近8場聯賽贏咗6場，向聯賽前5名位置逼近。高士路喺主場演出好有保證，近6場主場拎到4勝2和，包括擊敗過榜首法林明高，以佢哋依家嘅狀態同決心，加上主場氣勢，呢3分係志在必得。

聖保羅作客任人劏
聖保羅近期球場內外都立立亂，南球盃8強被小保加淘汰後，教練杜利華祖利亞曾批評球迷缺乏支持，結果受到猛烈批評，上星期又因為拖欠經理人費用，被國際足協頒「禁買令」處分，進一步打擊更衣室士氣，上場就喺領先下反輸山度士。事實上，聖保羅喺巴甲表現持續低迷，作客成績更加慘不忍睹，最近9場聯賽作客，錄得1和8負嘅羞家成績，今場都係凶多吉少，放心捧主勝。