蘇哈仔：勞基梳爾你是最好的_星島日報

先輸曼城，再不敵白禮頓，兩場都在大好形勢下輸波。曼聯在剛周末英超終於喘口氣，雖然未能贏波，但末段入波作客1:1逼和富咸，唔駛用敗仗進入長國際賽期。勞基梳爾今仗復出，表現唔算出色，但諷刺的是他原來是最好的。

勞基梳爾踢了頭三輪英超後，就因傷缺陣之後三場比賽，卡域克前兩仗用柏德列多古頂替其位置，對曼城一仗多次出現低級失誤，甩位、傳失波、踢空氣統統做齊，所失一球正是緣自他傳送失誤，再走到右路想補鑊，令防守左路暴露空位被艾寧夏蘭特射入。上周中聯賽盃對白禮頓，卡帥頂唔順換了馬沙拉奧客串左閘，進攻無貢獻，防守作用亦不大，不停受壓在邊路幫唔到手。

勞基梳爾今場復出，老實說水平只算一般，但他基本上沒有犯錯，有兩次槍斷和一次解圍；進攻上無直接參與入球，但幾次的後上時間做得不俗，並貢獻較具級數的傳中。曼聯踢了七場比賽，用過幾位閘位球員，發覺勞基梳爾原來已是最好的，達洛治一貫地干庸，多古同馬沙拉奧更加係幫倒忙。

曼聯防線特別是兩閘，級數不足已眾所周知的問題，紅魔高層按自己的時間表，今夏先進行中場重組，後防唔買人留明年先大換血。這決定註定今季會受苦，卡域克手上資源不夠，成績唔好唔應該搵佢孭鑊，紅魔應跟住自己的時間表﹗蘇偉業