英超：攻擊手晒冷戰意非一般 曼聯爭連勝大陣仗_東方日報

英超周二凌晨獨腳戲，曼聯主場迎戰般尼茅夫，力爭展開另一次連勝走勢。「紅魔鬼」上場4比1大炒狼隊，踢出今季最佳進攻表現，氣勢如虹，般奴費南迪斯、麥比奧莫等攻擊球員狀態大勇，對住踢法進取嘅般尼茅夫，駁火味濃，中位數3.5球入球大值得推介。（Now 621周二凌晨4時直播）文:工廠仔

曼聯今季表現不穩，但喺魯賓艾摩廉嘅改革之下，進攻戰術逐漸成型，般奴費南迪斯、麥比奧莫、馬菲奧斯根夏同美臣蒙特等攻擊手，開始產生化學作用。麥比奧莫、阿密特迪亞路兩位前鋒，據報獲准踢埋今場先出發踢非國盃，喺離隊前肯定會施展渾身解數爭取入波。

「紅魔鬼」依家最大問題係防守不穩，近8場比賽都有失波，面對死球亦經常失守，完全畀唔到人信心，只能夠靠進攻火力去彌補。曼聯近9場比賽有7場都攻入至少2球，奧脫福主場出擊會繼續以攻代守。

般尼茅夫防線甩漏多
另邊廂，踢法主攻型嘅般尼茅夫近期狀態低迷，對上6場聯賽2和4負未贏過，就算有人氣前鋒安東尼施美安數胡，後防甩漏咁多，入極都唔夠輸。般茅作客例牌中門大開，近5場作客賽事失咗15球，總入球全開4球或以上，佢哋同曼聯都係攻強守弱，3.5球入球大值得再追。