歐聯：喜鵲作客曳讓唔起利華_東方日報

支英超兵紐卡素，今晚歐聯作客硬撼德甲勁旅利華古遜。「喜鵲」出名客場差，後防又多傷兵，造訪硬淨嘅利華唔輸都偷笑，利華仲有得受讓咁筍，梗係捧讓球主勝（+1）。（Now 639周四凌晨4時直播）文:法達斯維

紐卡素今屆歐聯5戰獲3勝2負，未計今輪排第11位，距離前8嘅直接出線席位只差1分，不過呢支東北部球隊一向「主強客弱」，開咧後各項賽事踢咗9場作客，僅得2勝3和4負，單計歐聯就1贏1輸，贏嗰場係大炒弱旅聖基萊斯聯，之後造訪馬賽領先下反輸1比2，客場例腳仔軟。而對馬賽之役出醜嘅門將尼克普比受傷，右閘捷比亞同中堅保治文仍未康復，近6仗場場有失波，後防表現騰騰震。

利華古遜易帥後回勇
另邊廂，利華開咧冇耐果斷炒坦哈格，搵嚟前丹麥國家隊教頭賀文特接手，總算止住跌勢，帶隊18仗獲11勝3和4負，重返德甲前列之餘，今屆歐聯5戰取得2勝2和僅1敗，包括作客勇挫另一支英超勁旅曼城2比0，捷克箭頭柏德列舒希克今季入5粒兼交出2次助攻，絕對係「喜鵲」心腹大患，主場出擊仲有得受讓，利華讓球主勝（+1）咪錯過。