意大利盃：拉素打醒精神蓄細迎Ａ米_東方日報

今晚意大利盃16強重頭戲，拉素主場再遇AC米蘭。雙方剛於上場聯賽交手，拉素作客以0比1落敗，今場返自己地頭，應該會打醒精神，避免輸多次。佢哋鋒線雖然啞火，但防守尚算可靠，近7場總入球全開2球或以下，加上A米近期頻「煲魚生粥」僅僅熟小勝，捧中位數2.5球嘅入球細。

（周五凌晨4時開賽）文:Mic少

拉素今季表現麻麻，聯賽13戰只得5勝3和5負，並且往往「遇強即屈」，包括不敵羅馬及米蘭雙雄，呢3場敗仗都入唔到波，所以唔好期望今場輕易報到仇。加上射手簡些利亞尼有傷在身，教練沙利近期焗用保拿爾迪亞擔正，但呢位塞內加爾國腳把握力甚低，近11次上陣全食白果，難對A米防線構成威脅。

A米繼續「悶蛋足球」
上屆意大利盃亞軍A米由阿里基執教後，踢法穩打穩紮，經常小勝收場，近4場就有3次贏1比0。雖然踢法唔好睇，但勝在交到貨，依家排意甲榜首，由於有主力基斯甸普列錫養傷，預計A米唔介意繼續踢「悶蛋足球」，今晚屬一場過定生死，兩隊會更為謹慎，入波唔慌多。