英超：施洛轉Plan捧紅軍半場細_東方日報

傳控踢法失敗決森求變
英超重燃戰火！開季成績令人失望嘅利物浦，將喺主場迎戰回復穩定嘅諾定咸森林，重響勝鼓並非易事。「紅軍」領隊施洛為堵塞後防漏洞，近期改變戰術提高防守效率，面對組織嚴密嘅森林，踢法唔會過分冒進，好大機會演變成拉鋸戰，開1.5球半場細機會高。

（Now 621及611周六晚11時直播）文:工廠仔

「紅軍」喺今夏大事增兵，領隊施洛打算轉踢控球組織，結果進攻未見提升，反而令後防漏洞百出。近期利物浦已「還原基本步」，放棄用對抗性較弱嘅域斯出任中場，用番上季賴恩格雲貝治、阿歷斯麥亞里士打同蘇保斯拉爾嘅「冠軍三角」，球隊逼搶效率明顯好轉，近兩場喺晏菲路出戰，分別2比0贏阿士東維拉同1比0贏皇家馬德里，相信今場會繼續做好基本嘢。

森林硬淨唔易擊破
另邊廂，諾定咸森林季初經歷大混亂，但自從聘請戴治執教後，球隊逐步回復穩定，近5場比賽只係輸過1場。戴治執教風格以硬朗防守見稱，非常適合森林穩守突擊打法，以防守中場艾利洛安達臣為首嘅防禦網，對手要擊破佢哋有一定難度，比賽早段雙方鬥搶，未必能夠分出高下。翻查兩隊近6次交手，上半場多數勢均力敵，有5次半場總入球開1球或以下，今場一於再追1.5球半場細。