女歐聯：近年交鋒食住對手 巴塞女足讓客好路_東方日報

女子歐聯上演前列大戰，今屆連場大勝嘅車路士女足，主場迎戰冠軍大熱門巴塞隆拿女足，將迎接最大考驗。車路士女足對上兩輪贏波，不過對手實力有限，遇上女子頂尖班霸巴塞女足，無論實力同經驗都唔及對手，加上巴塞女足近3次鬥「車女」都贏2球或以上，讓球客勝（-1）放心捧場。

（Now 643周五凌晨4時直播）文:工廠仔

車女近期傷兵多
車路士女足實力強橫，不過近期受到傷兵問題困擾，卡戴莎布查蘭、艾絲賓、美娜拉美妮絲都已缺陣幾場賽事，門將漢娜咸頓更可能要到明年先可回歸，近兩場聯賽先後喺阿仙奴女足同利物浦女足身上失分，已經響起警號。車路士女足上場歐聯可以6球大炒聖普爾頓女足，只因對手太弱，參考性唔高。

巴塞女足今屆歐聯3戰全勝，而且踢得非常輕鬆，包括以7比1大炒德國勁旅拜仁慕尼黑女足，盡顯冠軍風範。巴塞女足自上屆決賽飲恨後，近14場正式賽事贏13場，當中有11場贏3球或以上，大勝比率接近八成，完全係超班表現。

雖然車路士女足防守能力唔差，但原來兩軍對上3次交手，全由巴塞女足獲勝，而且都贏2球或以上，包括上屆歐聯4強，巴塞女足主、客兩回合都以4比1大勝而回，擺明食住「車女」，今場放心直取讓球客勝。