外圍賽：歐洲4條King射術大比併_東方日報

世界盃歐洲區外圍賽殺入直路，今晚4大弗爆射手C朗拿度、艾寧夏蘭特、基利安麥巴比同哈利卡尼齊齊登場，為國家隊賣力上陣。除咗英格蘭已穩奪決賽周入場券，葡萄牙、挪威同法國仲要盡最後努力，又睇下呢副「歐洲4條King」今晚會唔會瘋狂數胡！文:臻贏特

夏蘭特領軍挪威半大愛得過
今晚世盃外歐洲區I組，榜首挪威主場撲擊愛沙尼亞。呢組得番兩輪，挪威暫領先次席意大利3分，而且得失球大幅領先「藍衣兵團」，原則上挪威今場贏波就已經接近直接出線，「魔人」艾寧夏蘭特外圍賽狂入12粒，弗到爆廠，隨時半場大屠殺，2.5球半場大照放心捧。（周五凌晨1時開賽）

愛沙尼亞有安尼亞都唔掂
先講講形勢，今輪挪威只要贏波，同時意大利作客摩爾多瓦失分，挪威就直接出線。不過即使意大利全取3分，尾輪兩軍直接交鋒，挪威現時淨得球26球，意大利得10球，意軍最後一場要大炒先可以反超，所以挪威今場贏波出線就十拿九穩。值得一提嘅係，挪威上次殺入世盃決賽周係1998年，當年佢哋16強就係畀意大利淘汰出局，今次壓住仇人出線，感覺特別爽。

雖然話挪威贏1比0都夠出線，但話晒主場出擊，球員唔會錫住嚟踢，尤其夏蘭特入波停不了，外圍賽入咗12粒，只差4球就打破羅拔利雲度夫斯基紀錄，而挪威亦只欠5球，就成為世盃外入波最多球隊，預計今場都會先發制人，半場入多幾粒盡早鎖定勝局。

愛沙尼亞本身實力麻麻，防線重心祖拿斯譚美因傷落選，門將恩高蘭則因私人理由申請免役，實力進一步削弱，佢哋作客表現更打折扣，即使有香港球迷熟悉嘅前理文前鋒安尼亞壓陣，但球隊近4場作客輸3場，遇着近3場世盃外主場，半場全開3球或以上嘅挪威，難逃大敗，半場大要捧。