沙特職：凍結京治斷卡赫利半臂 艾哈森布陣精打細算_東方日報

今晚又有得免費睇沙特職直播，艾哈森主場迎戰卡赫利。新升班球隊艾哈森冇大灑金錢增兵，不過佢哋位主帥卡特利係防守大師，曾經喺世盃打出名堂，唔可以睇少；至於卡赫利近期狀態亦一般，兼且過份依賴射手祖舒亞京治數胡，一旦被凍結就同斷臂冇分別。參考雙方近3次對賽，總入球全開2球或以下，一於再追中位數2.5球嘅入球細。

（on.cc東網周四晚10時55分直播）文:臻贏特

艾哈森星味稍為遜色，球隊上季沙甲獲得第3位，透過附加賽取得升班資格。雖然會方今夏作出多單轉會交易，但並冇簽入具名氣球星，最貴收購只係用58萬美元（約450萬港元）買入葡超球會甘馬雷斯門將般奴華利拿，其他人腳亦名不經傳。隊內「最具級數」人物係教練卡特利，佢曾率領突尼西亞出戰上屆世界盃決賽周，代表作一定係分組賽爆冷以1比0擊敗法國，但突尼西亞最終仍然出局，3戰入1球及失1球，可見卡特利戰術非常保守。艾哈森由卡特利執教之下，攻力亦甚為疲弱，今季聯賽3次主場出擊都冇波入，恐怕咬唔入卡赫利。

主隊教頭防守有料到
另邊廂，卡赫利擁有曾效力般尼茅夫、愛華頓及屈福特嘅射手祖舒亞京治助陣，呢位挪威前鋒今季聯賽上陣7場入9球，佔咗球隊一半入波，的確功架十足。不過，卡赫利太依賴祖舒亞京治數胡，亦存在好大風險，一旦佢遭對手凍結，鋒線勢必即時啞火。尤其是對手艾哈森主帥卡特利擅於布防，預料會派人嚴密防守祖舒亞京治，削弱其威脅力。此外，卡赫利上仗惡鬥完勁旅伊蒂哈德，球員耗力甚大，或會影響今場發揮，既然雙方都欠缺勝算，寧願博入球細。