歐聯：祖記新帥大改革見成效_東方日報

祖雲達斯歐聯主場迎戰士砵亭，亦係新帥史巴列堤上任後首場歐戰（Now 644周三凌晨4時直播）。史巴列堤上場首度領軍即進行大改革，向來踢4後衞嘅佢亦擅長「因材施教」，佢認為祖雲達斯陣容更適合「352」陣式，3大前鋒杜辛華荷域、奧賓達同約拿芬大衞可以有兩個上陣，而史巴列堤最精彩一步，就係畀古普美拿斯「重操故業」踢番中堅，作客贏克雷莫納2:1一役，令改革初見成效。

名宿籲熱刺雪藏兩叛將

熱刺上場聯賽0比1不敵車路士後，法蘭克走入場中打算同雲迪雲（圖）、迪積史賓斯訓示，點知兩人當佢透明直接走人，呆咗嘅法蘭克只能企定定望住佢哋走，震驚畫面引起球迷熱議。據報法蘭克嘅防守性戰術，逐步失去更衣室支持，英格蘭名宿高夫斯指法蘭克欠缺管教大牌球星經驗，要考慮罰兩個叛將停賽立軍威。熱刺周三凌晨會喺歐聯主場對哥本哈根，投注前要望望陣容有乜變動。（Now 639周三凌晨4時直播）

槍手雙閘助攻超煞食

「槍手」阿仙奴喺英超企穩榜首，兩閘卡拉費奧利（圖）同祖利安添巴表現大獲好評，佢哋唔單止防守出色，亦係阿迪達戰術中嘅進攻秘密武器，兩人喺聯賽合共貢獻3入波同3助攻，卡拉費奧利今季20次射門係全隊第2多，添巴嘅xG有2.01亦係全隊第2，比布卡約沙卡仲高。卡拉費奧利同添巴分別有28次同34次禁區內觸球，喺英超後防嚟講屬好誇張嘅數字。阿仙奴嚟緊周三歐聯作客捷克布拉格斯拉維亞，睇下兩閘有咩表現？（Now 643周三凌晨1時45分直播）