英超：爭奪榜首開火鬥轟 皇馬巴塞打吡大搏拳_東方日報

西甲上演「國家打吡」兼榜首大戰，「一哥」皇家馬德里主場火併「二佬」巴塞隆拿，呢兩支傳統宿敵無論任何賽事碰頭，都會採取主攻，力爭擊敗對手，加上雙方現時狀態同樣處於巔峰，更加有本錢互相駁火。參考「皇巴」近6次正式賽事交鋒，總入球全開4球或以上，一於再追中位數3.5球嘅入球大。（Now 632周日晚11時15分直播）文:Mic少

皇馬上場歐聯小勝祖雲達斯1比0，但其實全場佔壓倒性優勢，作出28次射門，比對手多超過1倍，可惜球員浪費唔少入波機會，否則起碼可以贏到3、4球。「銀河艦隊」勝在鋒線人腳質素高，今仗應該可以重拾射門鞋，尤其是射手基利安麥巴比狀態仍然相當勇猛，今季12次上陣有15球進帳。值得一提，「麥總」近3次踢「國家打吡」都有波入，合共轟入5球，成為巴塞防線噩夢，隨時再數胡。

此外，中場祖迪比寧咸上場歐聯入波，今季終於開齋，可見佢已經走出傷患陰霾，只要呢位英格蘭國腳發揮應有水準，勢必對巴塞大門構成重大威脅。

比寧咸開齋福仔腳風順
另邊廂，巴塞隆拿攻力比皇馬有過之而無不及，今季9場聯賽入24球，屬於西甲之冠，上場歐聯大勝奧林比亞高斯6比1，拉舒福特梅開二度，證明由佢代替養傷嘅中鋒羅拔利雲度夫斯基位置，效果非常好。雖然教練費歷克今場停賽，但現今通訊科技發達，相信呢位德國名帥用遙距方式指揮比賽，影響並唔大。

巴塞隆拿落後皇馬2分，只要今場贏波，就可以反超前對方，升上榜首，爭勝決心一定強，加上呢兩支傳統宿敵無論任何賽事碰頭，都會採取主攻，今場有望再次合演入球騷。