歐聯：利物浦博反彈打爆法蘭克福_東方日報

利物浦於英超「雙紅會」輸波後今晚再登場，在歐聯第3輪作客德甲法蘭克福。「紅軍」上場輸畀曼聯後累積4連敗，球隊固然存在唔少問題，但留意到佢哋主攻踢法不變，今場面對防守並唔算嚴密嘅法蘭克福，將有大量入波機會，贏面仍然頗高，利物浦今場讓半一唔嫌多，照捧上盤。（周四凌晨3時開賽）文:邪神

利物浦經歷4連敗，聯賽3連敗外，仲有歐聯作客0比1輸畀加拉塔沙雷，當中問題一大籮，包括兩位重磅新援域斯同阿歷山大伊沙克未適應、穆罕默德沙拿狀態急跌、路易斯迪亞斯同阿歷山大阿諾特離隊後整體攻守能力減弱等，不過對於主帥施洛嚟講，只要利物浦贏番波，上述問題都唔係問題。

其實上場「雙紅會」所見，利物浦面對防線密集嘅曼聯，仍然能夠多次攻入腹地，只係加普多次中楣中柱，入唔到波只係唔好彩，今場對手法蘭克福後防奇差，利物浦入波機會只會更多，亦係施洛贏波反彈嘅好機會，加上「紅軍」近5次歐聯對德甲球隊全勝，贏面更高。

全力攻破豆腐防線
法蘭克福今季表現極度反覆，戰績大起大落，令捧場客難以捉摸；在歐聯賽場上，該隊頭兩輪同樣錄得1勝1負，包括5比1大勝加拉塔沙雷，之後又以相同比數大敗於馬德里體育會腳下，不過單講後防表現，近5場狂失18球，利物浦對住呢條豆腐防線，焉有不勝之理。