歐聯：鋒線撻着Vs保帥焗攻 艦隊撼祖記開火大鬥法_東方日報

歐聯第3輪重頭戲上演2017年決賽翻版，皇家馬德里主場迎戰祖雲達斯，「歐聯專家」皇馬走勢銳不可當，自8月西甲開鑼以來，各項賽事近11場贏10場，主W熱到只有1.39倍，證明兩隊實力屬於唔同層次，「銀河艦隊」勝算高唱入雲。至於「祖記」為開齋，力保出線希望，亦要豁出去一搏求勝，隨時互相鬥攻，首選中位數2.5球嘅入球大。（周四凌晨3時開賽）文:Mic少

雙方曾於今年7月世冠盃16強交鋒，皇馬小勝「祖記」1比0，當時兩隊水準尚算勢均力敵，但其後發展南轅北轍，「銀河艦隊」愈戰愈勇，近11場賽事只係試過西甲2比5不敵馬體會，其餘10場全勝，包括兩場歐聯分別以2比1擊敗馬賽，同埋大炒卡拉特5蛋。前鋒基利安麥巴比着晒火，今季為皇馬上陣11場已有15球進帳，加上雲尼斯奧斯祖利亞、艾達古拿等進攻球員狀態亦相當勇猛，要攻入祖雲達斯大門，並唔困難。

祖雲達斯入得失得
不過，皇馬防線唔多穩陣，近9場僅3場不失球，加上中堅甸恩胡積臣等5位防線球員有傷在身，估計就算贏波，亦未必能夠保住清白之身。事實上，「銀河艦隊」近4次歐聯對意甲球隊都有失波，並且總入球全開4球或以上，今場隨時又開大比數。

另邊廂，祖雲達斯表現每況愈下，各項賽事近6場未贏過，上場意甲更加吞科木兩蛋，教練杜陀下台壓力愈來愈大，未來賽事惟有焗攻，希望重敲勝鼓保住飯碗。「祖記」今屆歐聯踢法相當開放，分別打和多蒙特4比4，同維拉利爾踢成2比2，遇上攻力強大嘅皇馬，可望合演入球騷，2.5球入球大玩得過。