曼聯車仔「和」氣生財

曼聯車仔「和」氣生財

弊傢伙！車路士冇前鋒！迪亞高哥斯達傷勢成謎，杜奧巴年華漸老，雷米又傷埋，唔怪得藍戰士今晚作客奧脫福鬥曼聯之前，摩連奴話和波都係唔錯嘅結果，講到咁白，就一齊捧和局啦！（周日47，now621台周一12:00am直播）

紅藍會今晚搭正凌晨開打，自然係萬眾矚目，曼聯雖然係今非昔比，甚至已經唔喺爭標行列當中，但係佢哋大動作增兵兼經歷一輪磨合之後，近況的而且確有好轉，單計主場更加累積3連勝，分別擊敗昆士柏流浪、韋斯咸同埋愛華頓，可見奧脫福主場嘅威力又番嚟，絕對不容忽視。

紅魔夠團結多利好消息

路爾斯華倫西亞同埋莊尼伊雲斯繼續養傷，朗尼亦要坐多一場波監，好在曼聯仲有法卡奧同埋尹佩斯兩個高質素前鋒，理論上威力不減，更何況爆炸頭費蘭尼再獲重用後，喺西布朗一役射入加盟紅魔鬼嘅處子球，另一新援戴利白蘭特都開埋齋，迪馬利亞又證實輕傷痊癒，加上迪基亞發表留隊宣言，拒絕皇馬利誘，曼聯並唔係咁易被擊敗。
車路士氣勢雖然勁，呢期仲取得6連勝，正如阿仙奴名宿韋拉所講，藍戰士今季不敗封王並唔出奇，但要留意佢哋今晚冇前鋒用，即使筆者亦認為迪亞高哥斯達受傷係煙幕，預期正選名單都會見到呢位西班牙前鋒，不過佢啱啱喺前幾日入院檢查始終係事實，只怕身體質素並唔係處於最佳狀態。

車路士或被迫擺無鋒陣

根據摩連奴所講，杜奧巴正選上陣機會唔大，雷米就傷咗鐵定缺陣，雖然夏薩特、法比加斯同埋奧斯卡杜斯山度士等創造型中場都有入球能力，不過冇個正宗射手點都差啲，何況球隊上屆最佳球員艾斯派古達停賽，防線穩健度受影響，是役唔輸俾曼聯唔出奇，但要贏就肯定唔易，平手盤隨時冇交收白玩一場，而買紅魔鬼「讓主」就冇肉食，不如直接買3.25倍嘅和局仲實際。