曼聯“後”顧之憂

曼聯“後”顧之憂

曼聯上季在聯賽排第七，是自有英超以來成績最差一季，連參加歐戰都冇資格，的確係最失敗一季。貴為全球最受歡迎球會，又點可以一衰再衰。今季邀得大師級教頭雲戈爾“入魔”，希望可以帶領球隊重振雄風，雲戈爾的執教功力相信所有紅魔迷都不用質疑，問題係球隊戰鬥力是否需要大改進。

到目前為止，球隊正式嚟講仲未有重鎊收購，只係從西甲中游球隊畢爾包買入靴里拉，還有修咸頓後衛梳爾。老實講句，呢兩位球員暫時並未去到星級位置，靴里拉在幾場熱身賽中都交出水準，但梳爾首披紅魔戰衣就令人失望，連雲戈爾亦只得一句評論：“梳爾不在狀態。”如果一個具質素球員，要等到有狀態先有作為，咁就慘啦。

雖然轉會市場仲未關閉，曼聯仲有補充軍力時間，不過球會依然冇乜風吹草動，交投仍然淡靜，雲戈爾到底幾時先出手？曼聯今季先後有維迪、李奧費甸南及艾華離隊，三位球員都係後防核心，即係話球隊當務之急，就要補充防線力量，至少還要引入一至兩名世界級守將，三線實力才可得到平衡，否則就會“後”患無窮。