馬體會依然強橫

馬體會依然強橫

之前介紹過英超、德甲及西甲幾支爭標分子人腳變動情況，似乎講漏咗西甲一支黑馬，就係馬德里體育會。話晒呢支實力派球隊上季壓倒兩大班霸皇馬與巴塞，重奪西甲聯賽冠軍兼歐冠盃亞軍，證明戰鬥力絕不簡單，可以躋身於歐洲頂級勁旅行例。

馬體會今季有唔少猛將離隊，包括食糊人物迪亞高哥斯達、菲臘比、大衛維拉及門將高爾圖斯，表面上實力可能大打折扣，但實際上依然具有爭標能力。球隊陣中仍然有高基、加比、杜蘭、魯爾加西亞、哥甸及恩素亞等具質素球員。入貨方面，教練施蒙尼針對性補入流失位置，鋒線共用咗六千萬歐元簽入文迪蘇傑、基斯文及二十歲阿根廷新星哥利亞。呢三位攻擊手都具一定份量，前兩者屬於國腳級，至於哥利亞更係施蒙尼新希望，即使走咗迪亞高哥斯達與大衛維拉後，火力依然勁量十足。至於菲臘比的位置，就由身經百戰，踢過賓菲加、國米及拉素等大球會嘅施古爾拉代替。基本上施蒙尼嘅陣式並冇太大改變，只係新舊球員磨合問題，所以來季馬體會仍然係皇馬與巴塞最大勁敵。