阿仙奴難成氣候

阿仙奴難成氣候

幾經艱苦經過八年抗戰之後，阿仙奴終於在上季打破“白果”宿命，在驚濤駭浪形勢下捧走足總盃，一嘗冠軍滋味。領隊雲格亦都得到球會再度續約三年。如果一七年之前冇乜意外唔炒的話，“雲總”呢個“廠長”位做超過廿年有多，又係球會一個超長紀錄。

要球會強大，就要入貨，只不過，“雲總”一向買人宗旨，首先價錢唔係問題，最緊要平，繼上季以球會破紀錄五千萬歐元收購奧斯爾後，今夏再以三千萬英鎊引入A山齊士，已經係超大手筆。其實一個半個超級球星加盟，對球隊實力可以提升幾多？相信大家心中有數。除咗A山齊士外，暫時亦只簽入法國後衛迪保治，身價為一千萬英鎊。表面上“雲總”曾暗示仍會有重鎊收購，但實際都係“口爽銀包旱”。之前傳出目標有巴洛迪利、基迪拿、曼城中堅拿斯達斯及哥倫比亞國門奧斯賓拿等，但至今都係得个“吹”字。最積極只係傾緊修咸頓“花靚”中場，廿歲未夠嘅“黃毛小子”卓賓斯，標價七百萬英鎊，在“雲總”心目中，可能價廉物美。

但老實講句，如此政策，阿仙奴想與列強爭霸，確實有一定困難，遲早前四位置都不保。咁搞法，的確唔係辦法。