A米主勝「曼」勿錯過

A米主勝「曼」勿錯過 
 
美國匹滋堡上演重量級大戰，剛遭逢慘敗嘅AC米蘭，為咗盡早重拾士氣同信心，今遇曼城肯定認真對待，考慮到藍月亮派出過多新人演習，紅黑兵團可望大蝦細成功，簡簡單單捧主勝齋Win。（周日29有線61及201台周一4:00am直播）

恩沙基擔正做AC米蘭教練嘅第一場波，就以0:3不敵奧林比亞高斯，真係冇晒面，雖然當日嘅陣容冇巴洛迪利，但陣中依然有唔少球星，呢個賽果絕對唔可以收貨，好在佢哋嘅死對頭祖雲達斯日前友賽爆出驚天大冷門輸俾業餘球隊，依家全意大利都笑緊斑馬兵團新帥艾基利，恩沙基所承受嘅壓力先至少咗，所以今戰要省招牌喇。

紅黑兵團經驗十足

事實上，A米美國此行人腳唔差，阿爾拉米、麥薩斯、薩卡度、安德列普利同埋白賴仁基斯坦迪呢班常規球員全部隨隊，前鋒線更有柏仙尼夥拍艾沙拉維，加上新援阿歷斯洛里高都有份落場，本田圭佑上仗對奧林比亞高斯亦只係後段入替，夠晒體能喺今場波踢正選，成隊紅黑兵團嘅實力同經驗都有番咁上下，閃電反底有乜出奇？

曼城世界盃腳未歸隊

曼城開操後3場熱身賽取得2勝1負，但對手只係登地、赫斯同埋肯薩斯體育會，完全受唔到任何考驗，最重要係好多世界盃國腳未歸隊，例如高柏尼、赫特、耶耶托尼、阿古路同埋迪斯高，所以領隊柏歷堅尼派大量新人落場，後防就算拿斯達錫同埋高拉洛夫擔大旗，中場得捷西斯拿華斯同拿斯尼比較有經驗，前鋒線由於尼格度傷咗，祖維迪狀態亦唔算好好，所以球隊喺熱身賽嘅進攻效率真係麻麻，對住AC米蘭班老江湖後衛相對輸蝕，藍月亮要贏有難度。
坦白講，紅黑兵團今次人腳好啲，而且喺痛定思痛之下，預料會踢番場好波，不妨對佢哋投以信心一票，捧AC主蘭齋Win摘藍月亮，支持恩沙基獲得勝仗。