紅牛平盤「城」竹在胸

紅牛平盤「城」竹在胸

美職聯聽朝直播東岸大戰由費城聯主場對紐約紅牛。費城聯近排勝出率極低，防線亦唔穩陣，加上兩位主力要坐波監，預期對住有亨利同卡希爾壓陣嘅紅牛全無優勢，平手盤必捧客勝。（周三7，無綫網絡電視301頻道周四7:00am直播）

雖然有主場之利，但費城聯過往喺自己地頭作賽成績只係麻麻，近10戰賽績係1勝7和2負，連喺美聯盃對住紐約宇宙同哈利斯堡島民，都唔可以喺90分鐘之內解決對手；此外，費城聯今場有拿侯特同奧古高兩名正選中場一齊坐波監，對陣容影響好大，難怪初盤唔使讓波開平手盤。
客軍紐約紅牛近況其實唔好得費城幾多，只係佢哋始終有亨利同卡希爾兩大一線球星撐場，喺呢類實力接近大戰肯定有着數；再講，紅牛今場除咗後衛阿曼度羅辛奴停賽外，其餘球員全數可以上陣，而對往績方面，紅牛近6次對住費城聯賽績係4勝1和1負，就連踢法都食住對手，讓球平手盤絕對抵玩。
另外尾場洛杉磯銀河會對新英倫革命。前者近8場波冇輸過，剛戰更喺主場贏到皇家鹽湖城，加埋陣容上得占士列尼以及杜尼雲特兩名二打六唔出得，要贏近4戰全敗嘅革命冇難度，讓到半、一都捧得過。（周三14，足智彩周四10:30am網上文字直播）

銀河讓得起革命半一

最後推介FC多倫多主場鬥溫哥華白帽加拿大打吡。多倫多有迪科爾及勞基摩亞等前英超兵，就算冇咗美國國腳米高巴特利，上場亦照大炒侯斯頓戴拿模；相反白帽啱啱俾芝華士狂數，近5次造訪多倫多亦輸晒，捧主W穩陣。（周三9，香港時間周四8:00am開賽）