德國盃:閉門作賽照賣飛　沙貝魯根奇招打氣

閉門作賽照賣飛　沙貝魯根奇招打氣德國盃周三凌晨上演4強大戰，沙貝魯根越級挑戰德甲5哥利華古遜。沙貝魯根係德國盃史上首支能夠打入4強嘅第四級別球隊，今場無論贏輸都已經創造歷史，佢哋身處嘅德國南部聯賽宣布咗腰斬，所以喺榜首有6分領先優勢嘅沙貝魯根，來季將可重返德丙，如果今場再贏可以講係雙喜臨門。精神支持賀創歷史雖然今場需要閉門作賽，不過沙貝魯根嘅球迷專門店同官方網站依然有今場門票出售，大家唔好以為佢哋擺烏龍或者呃錢，其實係因為沙貝魯根難得有咁出色嘅表現，球會對球迷無法進場支持感到好遺憾，所以希望球迷會以捐款形式「購票」，作為對球員一種精神上嘅支持，對手利華古遜嘅球迷一樣可以買，所有收益將會撥歸球會作為青訓及女子隊嘅發展用途。