E組套餐組合

E組套餐組合

今日介紹兩場E組畀大家，因理論上四隊仍有出線機會，不過實際上都係天方夜譚，除非兩連勝嘅法國輸幾球以上，未贏過波兼祇入一球嘅洪都拉斯又要贏對手十球八球，出線形勢才會大兜亂。冇錯，波係圓嘅，乜嘢可能事都會發生，但如果出現以上情況，小弟決定脫離球圈，不聞不問不睇波。

先講厄瓜多爾對法國，法國基本上出線在望，除非真係大敗一場，仲要輸成五、六球。以法國嘅實力，呢個可能性真係微乎其微；不過，唔排除球隊今仗會輕裝上陣，全面留力搏殺十六強。

厄瓜多爾搏殺程度肯定高於法國，就算爆冷唔到，都要守住不敗，博瑞士贏唔到洪都拉斯。因賽制列明兩隊同分先計得失球差，輸過畀瑞士嘅厄瓜多爾依然着數，既然法國會放軟手腳，受讓半球嘅厄瓜多爾的確有得諗。

另一場由洪都拉斯對瑞士，洪都拉斯在E組無疑係較弱嘅一隊，出線應該唔使諗，祇望踢場爭氣波不至於三連敗收場。

瑞士已經冇得計數，最保險就要贏洪都拉斯，祇要利用身形上嘅優勢，高空狂轟洪都拉斯，料必有斬獲。初盤瑞士讓一球／球半，捧瑞士“洪”運當頭。

推介：厄瓜多爾1：1法國；瑞士2：0洪都拉斯。