賓仔夠堅唔怕“刺”

賓仔夠堅唔怕“刺”

歐霸盃英超“死剩種”熱刺今晚主場出擊，迎戰葡超勁旅賓菲加，由於熱刺今季主場戰績並非突出，加上領隊舒活對歐戰“唔嗲唔吊”，反而對聯賽爭前四較為着重，今晚一戰去向未明，即使強陣全力爭勝，亦未必有取勝把握，始終對手實力並非二三流之輩。

多唔講，講賓菲加近二十場比賽取得十八勝兩和的佳績，真係唔知個“輸”字點寫，球隊剩係打士氣也已夠強勢，初盤熱刺小讓平手／半球，證明“大莊”對熱刺贏波亦冇十足的信心，不妨捧班“賓仔”唔怕“熱”。

熱刺在英超爭前四依然死心不息，甚至歐霸盃上圈作客迪尼普亦祇係半力出戰，反映舒活決心誓要帶領球隊踢到歐冠，況且過兩日仲要應付倫敦打吡戰對阿仙奴，做唔做到“阿四”，呢場波更加關鍵，所以唔排除老舒今仗會稍為留力。

賓菲加班波的確唔簡單，雖陣中球員名氣唔大，叫做豆腐洋蔥價錢，但有山珍海味嘅味道；講份量，球員腳下工夫與技術實而不華，絕不輸蝕畀熱刺班球星，加上歐霸盃對呢支葡超球隊極之重視，晉級決心必在熱刺之上，今仗至少可保不敗。

推介：和波1:1