紅魔“愛”得過

紅魔“愛”得過

英超今晚繼續開夜車，聯賽榜除阿仙奴稍為領先少少外，其餘第二至第九位嘅八支球隊都爭持相當激烈，只要贏一兩場波，隨時可以升上前四，所以當呢八隊“互毆”，肯定踢出火花。尤其今日介紹場曼聯對愛華頓，重點就係莫耶斯究竟有乜計可以殺退舊主，因為再有三長兩短失分的話，要追領跑嘅阿仙奴就更加困難。今仗對住一班舊愛將，一於冇面畀，三個字：殺，殺，殺。

球隊目前狀態都算唔錯，近十二場在各項賽事保持不敗，朗尼依然“弗”到爆；後防大將韋迪、雲佩斯與韋碧克亦可披甲上陣，有足夠能力全取三分。

今季只輸一場嘅愛華頓認真夠硬淨，但要留意一點，“拖肥糖”今季作客唔算突出，兩勝三和一負，除對曼城慘敗一比三外，其餘對手只屬下游球隊，甚至連包尾嘅水晶宮亦未能取得優勢，今仗對住曼聯實在難以睇好。皆因近十次到訪奧脫福只有三場和波，輸足七場未贏過，加上球隊基本踢法，莫耶斯應該瞭如指掌，愛華頓要搶一分都難。初盤曼聯讓半球／一球，捧曼聯可以嗒“糖”。推介：曼聯2：0