鎚仔打爆水晶宮

鎚仔打爆水晶宮

英超今周中又再加開快車，明晨先安排一場散打，由包尾嘅水晶宮主場迎戰韋斯咸。十三戰只得七分嘅水晶宮已經冇得諗，想留低英超，就要場場波搏命，確要搶得一分得一分。奈何人腳實力所限，面對任何對手，根本毫無搶分把握，黑心啲講句，下季返英冠踢啦。

韋斯咸亦唔好得好多，雖然排十五位，但只多降班線球隊三分，一樣需要搶分自保，對住實力較弱對手，當然要把握時機。呢場次級倫敦打吡戰，初盤只係平手，睇好“鎚仔幫”可以大鬧水晶宮。

水晶宮今季升上英超後，加入十幾個新球員，可惜都只屬於三、四線人馬，踢過阿仙奴嘅查馬克及維拉嘅班蘭算係較有質素，整體戰力仍未可在英超立足。就算自己主場出擊亦惡唔出樣，今季六個主場只贏過尾二嘅新特蘭，其餘五場一和四負，係英超中主場成績及入球總數最差，最大忌就係贏盤最少一隊，真係搵你要。

話晒韋斯咸陣中有唔少名氣球星，過氣嘅有祖高爾、路蘭及哥連斯，仲當打嘅有達寧、迪亞美及查域斯等。逐個秤，應該夠贏水晶宮。

推介：韋斯咸2：0