富咸大迫“宮”

富咸大迫“宮”

英超今晚打埋水晶宮對富咸後，已經完成八輪比賽，好耐未威過的雲格帶領阿仙奴“出頭”，以兩分優勢坐住“一哥”之位，可以坐得幾耐大家都未知，但睇完贏諾域治場波後，又值得做“一哥”，成班波今季真係脫胎換骨，組織配合踢得相當悅目，如果能夠繼續保持水準，確有機會重奪錦標。至於曼聯又畀我批中再次失分，衛冕之路又跌一交，莫耶斯確要醒醒定定。

講返今晚場推介，今季升上英超的水晶宮征戰七場，除擊敗包尾的新特蘭外，其餘六戰全輸，暫排尾二位置，以球隊現時戰鬥能力，要留低玩多季英超睇怕幾難，只望每場比賽搶得一分得一分，今晚主場迎戰中游班的富咸，都係醫生嗰句：“盡人事。”

富咸亦唔好得幾多，七戰過後只得七分，好過水晶宮少少排尾四，避免在降班邊緣越踩越深，同樣都要搶分自保。其實陣中具質素球員唔少，貝巴杜夫、拜仁雷斯、柏加、比達及卡沙米等都屬好波之人，相對於水晶宮應高出半班，稍嫌球隊欠缺氣勢，幸好上仗能夠殺敗史篤城，全取三分之餘更可提升士氣，今仗對手唔強，有望取得連勝，初盤平手，必揀富咸。推介：富咸2:0