熱刺開大“維”

熱刺開大“維”

英超今晚只得一場獨腳戲，由維拉對熱刺，兩隊早前曾在聯賽盃碰頭，結果熱刺打到維拉全無還擊之力，近三次對賽，熱刺贏足三場，攻入十球兼零失球，再數番維拉最近一次殺敗熱刺已經係○八年的事，唔通維拉撞熱刺就等於撞鬼一樣，“無運行”？當然，比賽最緊要講實力，熱刺人腳班底始終較為優勝，加上格食格打法，維拉打親都輸真係無計，希望經過上仗慘吞四蛋教訓後，今晚可以全力反擊，將戰情拉緊。初盤熱刺讓半球，考慮到維拉防線一向“流流地”，熱刺數糊能力亦唔差，捧熱刺確有數“維”。

其實維拉開季至今表現都算中規中矩，亦踢過兩場代表作，分別擊敗阿仙奴與曼城兩支豪門，可惜整體發揮時好時壞，上仗對侯城踢得相當平淡，簡直悶戰一場；此外，由於防線欠缺大將，維拉後防係球隊最大漏洞，成為輸波致命傷。

熱刺上仗貪勝不知輸，意外地被“鎚仔幫”打殘，跌出前四位置，相信今仗作客會格外留神，除加強中後場截擊力外，前線蘇達度將復任正選，夥拍當勇當“弗”新星唐辛、保連奴及艾歷臣等，誓將怨氣發洩維拉身上。

推介：熱刺3:1