曼城爆史城曼聯細扑錘

曼城爆史城曼聯細扑錘

英超得聖誕，得天下！過去10季能夠佔據榜首過聖誕嘅球隊，有7隊可以笑到最後，奪得聯賽冠軍，當中曼市雙雄成功率更達100%。兩大豪門今季鬥得叮噹馬頭，踏入12月勢必大衝刺，搶做聖誕一哥，佔爭標先機！未來3輪英超非常關鍵，今晚頭關曼城作客史篤城、曼聯主場對韋斯咸，睇吓邊隊可先聲奪人！

曼城現僅以較佳得失球，力壓同分嘅李斯特城暫列榜首，亦只領先第3位嘅曼聯1分，稍有閃失，隨時要讓出一哥位置。慶幸呢支富貴球隊已走出上月低谷，接連喺聯賽及英聯盃報捷，兩戰轟入7球，重拾霸氣，同埋曼城已穩奪歐聯16強席位，可全力踢好英超，絕對唔會放過史篤城，曼城讓半一，照捧上盤。

（now 621周六8時45分直播）

雖然曼城射手阿古路有傷難披甲，但球隊已習慣呢名阿根廷射手經常缺陣嘅情況，事實上，佢哋不乏進攻猛將，特別係兩個新兵奇雲迪布尼同史達寧傳射俱佳，「布布」上仗英聯盃更梅開二度，加上大衞施華已復出，曼城中前場技術含量極高，走位靈活，可恰死粗枝大葉嘅史篤城防線。曼城上季作客以4比1大炒史篤城，有力重溫舊夢。

另一場，曼聯近兩個月死火，近8場有4場入唔到波，包括5場主場有3場悶和0比0，下周中歐聯又要同禾夫斯堡決生死，今仗主場對「錘仔幫」韋斯咸，或會勒住踢。韋斯咸射手迪亞法沙高受傷長抖，難以威脅由迪基亞把關嘅紅魔大門，一於揀入球細。

（now 621周六晚11時直播）

紅魔有歐聯後顧
紅魔今季成績提升，但踢法愈來愈沉悶，領隊尹戈爾一向固執，既然做出成績，佢絕對唔介意外界批評聲音。事實上，紅魔鋒線存在唔少問題，朗尼長期死火，今仗仲因傷缺陣，迪比冇料到，新希望安東尼馬迪爾跌Watt，尹戈爾想主攻都有心無力，即使今場贏波，都係小勝居多。韋斯咸今季贏過阿仙奴、利物浦、曼城、車路士，但近期走下坡，連續4場英超失分，兩大進攻主力皮耶、安拿華倫西亞養傷之下，射手迪亞法沙高上仗亦受重傷，令球隊雪上加霜，唔好期望可以再爆冷。