水手腳軟作客吼細盤

3日前雨戰踢到加時
今日又有一批日皇盃第3圈上演，星期日先踢完第2圈補賽嘅橫濱水手，又要作客對日乙尾二嘅大分三神，咁操勞恐怕入波都唔慌多，一於小注1.75倍入球細。

（開賽時間：周三晚6:00）

呢一輪嘅日皇盃依然有唔少日職對日乙嘅強弱對碰，鹿島、廣島、川崎都係開Ｗ機會比較大嘅日職強隊，唯獨橫濱水手就有啲危機嘞，一則係要作客，其次係3日前佢哋先踢埋場第2圈補賽，仲要雨戰打到加時至3:1贏隸屬JFL嘅Mio琵琶湖滋賀（足智彩一直用Mio琵琶湖草津個名，實質呢支由佐川急便京都足球部發展出嚟嘅球隊，早响2012年已經改名滋賀嘞），班人都幾辛苦吓。

或者大家會質疑水手上場都冇出中村俊輔、齋藤學呢啲人打正選，只要出番啲冇踢嘅一線兵，根本唔存在體能問題。實情係水手除咗大腦中村連後備都冇，後衞中澤佑二、法賓奴、中場三門雄太、前鋒伊藤翔呢批人都擔正，齋藤學後備上陣70幾分鐘，講唔上半力出擊，從戰情去睇，亦唔見得佢哋有足夠嘅攻擊力，對付啲着重防守嘅次級對手。

大分三神變咗衰神
更何況水手今日對住嘅係大分三神，呢支昔日日職分子，今季嚴重跌Watt變咗衰神，家陣首要任務係護級，避免跌落日丙，理論上唔輸有鬼。但係睇勻足智彩各瓣賠率，完全反映唔出水手往績佔優（12勝5和4負）兼盃賽對碰容易開大嘅特點，都係博吓個入球細算咯。