紐約紅牛多倫多大激鬥

萊特森 Vs 艾迪杜里
美職聽日將會上演「火力之王大對決」，由美職一哥紐約紅牛作客火併FC多倫多。家陣呢兩支球隊齊齊以31戰入55球嘅鋒力，並列美職常規賽士哥王。尤其紅牛呢排發晒狂，一次又一次咁重複轟破對手大門，之不過多倫多亦屬於惹火一族，為保季後賽席位嘅佢哋，今仗梗係唔會咁輕易投降，一場駁火戰睇怕都走唔甩，1.57倍入球大熱都要追。

（TVB301台周四早上7:00直播）

紐約紅牛最近開火冇停手，計埋佢哋上仗以2:1打敗蒙特利爾衝擊，班波近10場比賽有9仗轟入2球或以上，中場萊特森更加係愈入愈有，連續3仗均有建功。就連加納國家隊收到風，知道佢狀態炙手可熱後，都決定首次徵召呢位翼鋒入伍，出戰今朝同加拿大嘅熱身賽，就知紅牛呢排火力勁到有幾受注目。不過波友又唔使擔心，萊特森踢完今朝場太公波後，將會即刻去多倫多歸隊，今場駁火戰點都預埋佢一份。

兩軍55球並列士哥王
同為美職火力王，FC多倫多表現亦唔失禮，呢支東岸球隊連續3仗都攻入對手3球。射手艾迪杜里打破入球荒後，更連續2場士哥，由佢拍住技術上乘、近3戰入3粒嘅基奧雲高攻堅，儼如入波嘅代名詞。況且多倫多目前排緊東岸第5位，仍要出盡力爭奪季後賽資格，呢鋪仲邊會同紅牛客氣，兩軍同以55球並列美職士哥王，今晚睇吓邊隊至係真正嘅火力之王。