卡塔爾勢炒馬爾代夫

C組「一哥」卡塔爾今晚坐鎮主場對馬爾代夫，馬爾代夫剛作客不丹打開勝利之門，但下半場竟然連失三球，防守能力受到質疑，而且連續兩場作客舟車勞頓，點頂得住卡塔爾。卡塔爾小組四戰全勝，為進一步鞏固榜首位置，對弱旅殺無赦，今仗肯定把握主場之利大數馬爾代夫。

（周二晚11時30分開賽）

馬代連場作客舟車勞頓
完成C組一半賽事後，卡塔爾已經遙遙領先香港及中國5分，實力明顯比同組對手高，除集天時、地利、人和於一身，上仗對中國更懂得用計，球場開冷氣對付賽前以為會喺酷熱天氣下比賽嘅國足，今仗對馬爾代夫，佢哋如果照辦煮碗，馬爾代夫更怕凍，效果會更顯著。

不過，即使卡塔爾唔用「冷氣計」，實力亦比馬爾代夫高，C組首循環卡塔爾作客亦以1比0擊敗馬爾代夫，上輪兩軍雖然同樣贏波，但過程絕對唔同，卡塔爾主場1比0擊敗中國，馬爾代夫作客4比3贏不丹，但對住小組最弱嘅不丹都要失3球，馬爾代夫防守能力一般，今仗更難睇好。

卡塔爾主帥卡維雷奧上仗擊敗中國後，表示球隊唔會有任何慶祝活動，希望專心備戰今仗，而且球隊無病無痛，包括上仗頂入中國隊大門嘅布迪亞夫繼續候命，三分志在必得。