捧俄羅斯瑞典讓球勝

捧俄羅斯瑞典讓球勝

歐國外G組由於奧地利早已篤定首名出線，故今晚尾輪唯一懸念只係剩番俄羅斯同瑞典嘅次名之爭。現時排第2嘅俄羅斯領先瑞典2分，雖然只要今仗主場打和黑山，都可憑較佳對賽壓過瑞典，但無謂消極被偷雞。記得俄軍於外圍賽初段一度形勢惡劣，頭6仗歐國外僅得2勝，有傳名帥卡比路因欠薪而Hea教，直至7月被炒，俄足總搵嚟中央陸軍教頭舒特斯基兼任，臨危受命嘅舒帥採用嘅「即食政策」收效，最終連贏3場轉危為安，以其現時嘅氣勢，足以擊敗冇埋「小妖」祖維迪嘅黑山，直取俄軍讓球主勝。

（有線61及201台周二凌晨零時直播）

同時間舉行嘅瑞典則主場撼摩爾多瓦，前者形勢被動冇得諗咁多，一定要贏先至有價講，王牌射手伊巴謙莫域上仗2比0勝列支敦士登之役曾12碼宴客，之後又將功補過攻入第2球，相信今仗對弱旅摩爾多瓦唔會再失威，就算讓球主客和要讓兩球，照捧瑞典讓球主勝。

（有線64及203台周二凌晨零時直播）