森多利亞+1冇蘭度

今晚有兩場意甲上演，當中阿特蘭大主場對森多利亞值得留意。森多利亞近年成績唔錯，仲為意大利國家隊提供唔少新血，包括人氣急升嘅艾達馬田斯。呢位28歲巴西裔前鋒今季聯賽已轟入6球，有佢在陣，對住阿特蘭大當然未驚過。森多利亞仲有得受讓，讓球客勝屬過關之選。

（TVB 301周二凌晨3時直播）

森多利亞上季一度有望爭奪歐聯入場券，可惜季尾功虧一簣。球隊今季捲土重來演出仍不俗，上仗更砌低羅馬。森多利亞最犀利地方係擁有射手艾達馬田斯，呢位入球機器效率極高，難怪獲意國主帥干地邀請做歸化兵。加上中場羅拔圖蘇利安奴亦有上佳表現，呢兩位新星令森多利亞充滿活力。阿特蘭大近4場聯賽獲2勝2和，但對手只係費辛隆尼、薩斯索羅、維羅納及安玻里之流，今仗面對人腳更強嘅森多利亞，竟然要讓波未免太受高估。

「科大」行衰運再反
另一場意甲費辛隆尼主場對安玻里，費軍上仗爆冷逼和祖雲達斯1比1，但球隊始終攻力差，想佢哋主攻有啲難度。安玻里亦唔係叻，今場海軍鬥水兵揀入球細。

（TVB 301周二凌晨1時直播）

最後葡超里奧艾維主場對科英布拉大學，「科大」連盃賽在內今季6戰輸晒，衰開有條路一於再反，捧里奧艾維主勝。