法烏之戰必分高下

法烏之戰必分高下

法國與烏拉圭兩班小伙子終於如願以償，排除萬難齊齊殺入世青盃決賽，係“雙牙”出局之後最好戲碼；至於四強兩支失敗者加納與伊拉克雖然無緣錦標，但憑拼勁及鬥志，已經贏得讚賞，四個字：雖敗猶榮。

法國晉級過程唔算驚濤駭浪，分組賽輸畀西班牙其實無傷大雅，出線根本意料之事。入到十六強及八強對住土耳其與烏茲別克，實力明顯高出一班，“依絲執”形勢下，並未受到較大威脅。準決賽對加納叫做有驚無險，最終亦憑平均質素將“黑幫”鏟除，順風順水入決賽，係今屆世青盃中最正路一隊。

烏拉圭入到決賽真係千辛萬苦，出閘已脫腳輸畀克羅地亞，幸好調整過後越戰越勇，十六強淘汰非洲鷹尼日利亞盡顯南美勁旅本色，八強殺敗頂頭大熱西班牙，更加踢出代表作。不過，估唔到對住伊拉克竟然一額汗，落後、追和、至“射碼”才能解決對手，總算大步檻過。

法國與烏拉圭踢法上各有風格，法國個人技術及體力較為優勝；烏拉圭整體性較強，鹿死誰手，真係要踢過先知。