世青盃四強前瞻

世青盃四強前瞻

眨吓眼世青盃又踢到四強，汰弱留強呢句說話應該唔啱用，因為幾支熱門強隊遭遇滑鐵盧，齊齊意外出局，包括頂頭大熱西班牙、葡萄牙及英格蘭等；當然，入得四強亦有一定能力，隨時又爆出驚喜戰果。

四強對戰有法國對加納、伊拉克戰烏拉圭，唔夠膽講邊兩隊會殺入決賽，講過N咁多次，“仔波”實在難以捉摸，發揮係其次，最重要有拼勁，尤其是“仔”心態，例如“雙牙”，自以為高人一皮，睇唔起對手就踢“輕挑波”，先鬆後緊最終咎由自取；相反，明知自己實力稍遜，唯有知恥近乎勇，加多兩錢肉緊，以拼勁搭夠踢出加一波，呢種就係“仔波”特色。

四強中，法國無疑較為被睇好成為捧盃熱門，但今仗遇上黑色力量勁到爆的加納，肯定唔易打，呢班“黑仔”勝在“刨”得“砌”得兼爛打，而且越戰越勇，雄心壯志，法國未必過關。

打仗叻過打波嘅伊拉克能夠入到四強相信已經喜出望外，今戰激鬥烏拉圭但求盡力一拼，論個人質素與整體踢法，烏拉圭確實較為優勝，只要唔輕敵，有望殺入決賽。