丹麥U21輕鬆切「塞」

丹麥U21輕鬆切「塞」 
 
即使塞爾維亞U20歷史性咁捧走世青盃，都唔好睇到班師兄咁高呀，事關塞爾維亞擺明志在世青盃多過U21歐國盃，呢場A組分組賽遇到有番咁上吓實力嘅丹麥U21，可能係塞爾維亞U21嘅最後一戰。（周二3，香港時間周三2:45am開賽）
到底世青盃定係U21歐國盃重要？塞爾維亞就俾大家知世青盃重要好多嘞，事關佢哋一次將大國腳沙高域、世青盃銅球獎得主米連高域，同埋紅星嘅正選門將拉高域放晒喺塞爾維亞U20度，擺明係用傾國之力盡谷一隊波去爭冠軍，令到呢隊U21嘅實力要打番折扣，全隊波係得圖盧茲前鋒阿歷山大比錫、修咸頓借將菲臘杜歷錫，同埋多蒙特嘅米路斯祖積可以出到大場面，首戰和到德國U21恐怕只係因為對手仲未站穩陣腳，上場作客主辦國捷克U21輸成0:4咁多就完全唔覺得意外。

丹麥無懼同級對手

至於丹麥U21喺上輪分組賽雖然慘敗喺德國U21腳下，但係對手實在太強，要睇就睇佢哋喺揭幕戰半場落後俾主辦國捷克U21嘅情況下，憑下半場就反勝2:1，始終佢哋有喺阿積士打滾多年嘅域陀費斯查同埋尤素夫保臣坐鎮，有呢條前鋒線唔會怕同級對手。