德國超班「捷」足先登

德國超班「捷」足先登 

雖然捷克U21嘅基利文目前以3個入球排喺U21歐國盃射手榜嘅首位，但係係德國U21嘅禾蘭亦都有2球喺手，到底邊個先係神射手嘅真命天子，只要踢埋呢場A組分組賽就會有答案嘞！（周二2，香港時間周三2:45am開賽）
呢場神射手對決點都要睇高德國U21嘅禾蘭一線，始終捷克U21同埋丹麥U21目前都係手握3分，不過由於佢哋喺揭幕戰不敵對手，計番對賽成績佢哋目前排喺A組第3位，今晚一旦輸波就會立即出局，頂多得番一場分組第三名嘅奧運資格賽可以踢吓。

德國U21愈戰愈勇

反而德國U21就主動好多，再睇番佢哋喺分組首戰同塞爾維亞U21踢成平手，唔多唔少都係同球員仲未進入作戰狀態有關，不過唔好忘記德國佬一向都好識調整心態，所以佢哋經過首戰失分之後，好快就喺丹麥U21手上攞晒3分，其中效力賀芬咸嘅年輕射手禾蘭正正就係憑住呢場波攻入2球，相信佢今晚繼續會以正選身份領軍，而禾夫斯堡中場麥斯美艾洛特亦由大國腳「降呢」落到嚟U21幫手，利物浦嘅安利簡恩等新星亦喺齊晒度，有咁多位星級隊友幫手，想唔大炒捷克U21都難啦。