美國女足無與「倫」比

美國女足無與「倫」比
 
哥倫比亞女足能夠喺分組賽贏到以女子歐聯亞軍聖日耳門為骨幹嘅法國女足自然唔係魚腩，弊在一山還有一山高呢，佢哋喺美國女足面前恐怕只會淪為大配角。（周一2，香港時間周二8:00am開賽）

話晒法國女足有女子歐聯亞軍聖日耳門做班底，到呢一刻為止都係第三大熱，哥倫比亞女足喺此輪分組賽贏到佢哋就證明到佢哋絕對係今屆女子世界盃其中一隊黑馬，可惜嚟到16強就要執定包袱，因為佢哋非常唔好彩，要對嘅唔係一般對手，而係冠軍大熱美國女足！
已經唔係第一次講過美國女足係點樣勁法，門將蘇露有幾出名同埋靚女相信都唔使多介紹嘞，只係擔心佢哋嘅攻力唔夠，隊長雲芭芝已經35歲，冇錯以女足球員嚟講呢個年齡唔算好老，不過無論係對住澳洲女足定係尼日利亞女足尼日利亞女足都要勞煩到有傷在身嘅雅歷絲摩根幫手入波，好彩開到「-2」都尚算鬆手。