捧哥倫比亞好「魯」定

捧哥倫比亞好「魯」定

相比巴西，哥倫比亞真係冇咁彈性，雖然話哥倫比亞一贏就肯定出線，不過如果佢哋贏得多，巴西好樂意攞次名，但如果哥倫比亞贏唔到，到時巴西整個大比數和波出嚟，就直情踢埋哥倫比亞出局，所以費事計到咁盡，呢場對秘魯簡簡單單贏咗就算，至少8強唔會直接對上智利阿根廷。（周日21，now681台周一3:00am直播）

秘魯今屆賽事係令人有啲驚喜，不過講到底都只係贏委內瑞拉，而且都係憑多打一人優勢至贏，睇佢哋首仗由頭到尾俾巴西壓住打就知實力肯定係呢組最弱，所以對佢哋嚟講，想出線肯定希望守和哥倫比亞，因為得球較佳至少獲得一席第3出線席位。

哥倫比亞演出進步

問題係，如果以A贏B、B贏C嘅道理，巴西贏秘魯，而哥倫比亞就擊敗巴西，咁今場哥倫比亞理應贏得更輕鬆。事實哥倫比亞第一場不敵委內瑞拉，的確係打到不知所謂，不過第2仗己極速撥亂反正，上場用體能及身形壓到巴西組織唔到，今場照板煮碗秘魯可能連中場都過唔到，甚至極早失波，所以今場信哥軍可以早於半場奠勝局，買半主、「讓主」一樣得。