巴西和局「委」以重任

巴西和局「委」以重任

美洲國家盃C組完全亂局！首兩輪賽事過後4隊波互勝一場，得失球完全一樣，唯巴西及秘魯喺得球上有優勢，而最後一場就出現邊隊贏邊隊出線情況；不過現時情況其實冇咁簡單，因為離奇在於呢一組出現最佳小組第三機會絕大，而兩場波又非同時開打下，尾場巴西對委內瑞拉多數會有古怪賽果出現，不過再古怪巴西都應該唔敢輸，加上冇尼馬下，似乎有可能和局收場。（周日27，now681台周一5:30am直播）

C組賽事如果好正常咁睇，同組4隊3分，咪即係邊隊贏邊隊出線囉！不過美洲國家盃邊有咁簡單先，首先C組有一個優勢，就係可以睇住隔離兩組走線，二來現時只要有3分及得失球在「-2」以上，就可以取下一個最佳第3名資格，而巴西呢場波係後打，真係想點玩就點玩。

巴西未必爭奪首名

首先預算阿根廷早一日以首名出線，咁右邊線最強就會係阿根廷，而B、C組出現最佳第3名嘅話，阿根廷對手就會係C組第3名，所以巴西如果真係玩走線，以次名出線最理想；而事實上，如果頭場哥倫比亞贏秘魯，哥倫比亞有6分兼對賽成績贏巴西，巴西要走線就相當簡單，一係贏少過哥倫比亞，一係就賽和委內瑞拉，基於巴西本來得球比較多，巴西喺以上兩個情況都可以以次名出線，而左邊線面對B組次名，到4強都只係打智利，肯定比起提昨早撞上阿根廷為妙。

委內瑞拉一心求和

再講，委內瑞拉心態應該更簡單，就係出到線就咩都冇所謂，所以如果一切如估計，委內瑞拉只要唔輸得比秘魯多，又或者打和巴西，就好大機會同巴西雙雙出線8強，所以今場賽果肯定唔可以用雙方實力衡量，而巴西有尼馬停賽4場，如果作出上訴獲得減刑，就有機會決賽出場，咁既話走線對巴西就更加重要，而且今場缺尼馬，就更加大條道理攻唔入，呢場估雙方真係上演驚天和波唔出奇架。