斯洛文尼亞少波入「格」局

斯洛文尼亞少波入「格」局 

睇波為咗咩呢？都係想娛樂吓啫！咁究竟我前世做錯啲乜，電影台要播場咁嘅斯洛文尼亞對英格蘭俾我睇先！歐國盃E組榜首大戰，英格蘭開局5戰全勝，唔係佢哋勁，只係同組對手太弱，上場一如所料同愛爾蘭踢場0:0出嚟已經俾全世界大鬧，而斯洛文尼亞向來都係一支擅打901嘅球隊，呢場兩隊鬥唔識入波，我哋有片睇呢邊從來唔教人賭波，不過如果你買咗入球細，早啲轉台睇俄羅斯，又或者早啲瞓算啦！（周日18，有線61及201台周一12:00am直播）

先唔好講能力同打法，英格蘭面對今場榜首大戰，根本上冇一定要贏嘅必要，佢哋喺小組首5戰贏晒，餘下只要再取9分就一定以小組頭兩名出線，而同組有聖馬力諾、愛沙尼亞同立陶宛，攞唔晒9分暴動都似，所以實際上英軍同出咗線已經冇分別。
而有咁嘅形勢，鶴臣都真係定過台炸彈，首先俾哈利卡尼呢個英籍第一射手去打U21，已經見到佢有幾唔重視呢兩輪賽事，而中場缺卡域克，又係同曼聯一樣搞到進退失據，防線自泰利唔玩後一直冇一線中堅撐場，史摩寧、卡希爾等只係等出醜機會，而史達寧個心又唔係踢緊波，英軍上場同愛爾蘭悶戰一場已係意料之內，呢場作客攞一分又夠，大家睇住鶴臣賽後講，呢場佢哋已然達成攞1分嘅目標吧啦！

斯洛文尼亞唔識入波

斯洛文尼亞個名唔響，但人腳相當不俗，所以過去幾個外圍賽都幾乎出到線，不過佢哋打法過去幾年冇咩點變，一對正副選門將奧比勒同漢丹洛域已經犀利，中場有多蒙特奇雲甘柏，費倫嘅伊歷錫，都係歐洲一線尾級數球員，唯前線洛華高域等真係太老，唔好睇佢哋分組賽入10球，當中有6球都係對聖馬力諾攻入，所以呢場冇波入係正常，有1個入球大家要感恩，出現兩個入球以上已經係奇跡，不如留番啲精神睇放啲嘅西班牙仲好。