墨西哥贏「玻」冇難度

墨西哥贏「玻」冇難度

美洲國家盃A組賽事，墨西哥雖然並非以最佳陣容出征，不過對手玻利維亞離開高原主場就唔識踢波，故此墨西哥仍有能力全取3分，打開今屆勝利之門，足智彩開讓球盤，墨國讓半球、一球可贏「玻」。 （周五12，now681台周六7:30am直播）
墨西哥用兩套陣容踢美洲國家盃同埋美洲金盃都唔係第一次，儘管曼聯前鋒查維亞靴南迪斯不在陣容當中，但係有老牌隊長馬基斯鎮守後防，中前場亦有效力馬德里體育會嘅射手魯爾占美尼斯，聽講佢受到唔少大球會注意，不可不防。
玻利維亞咁多年嚟都係靠高原主場搵食，作客例必腳軟，決賽周前最後一場熱身賽慘負阿根廷0:5就係最佳例證，何況佢哋近期整體表現亦差，近7場國際賽輸咗5場，唯一勝仗係喺主場險勝魚腩委內瑞拉，可見呢隊玻利維亞好打有限。
足智彩今仗開半球、一球盤其實一啲都唔過份，事關墨西哥原來近6次對玻利維亞全部贏晒，當中有兩次都轟入對手5球，最近嗰次就係上年作客小勝1:0，真係當對手完全冇到，故此今仗有權贏晒全個盤旗開得勝，順便派錢益球迷。