美斯謙：日本明恰換血伊拉克

日本同伊拉克兩支下周二踢世界盃外圍賽嘅球隊，今晚會喺橫濱日產球場「拍跳」。日本今次雖有幾名主力因傷或狀態問題未有入選，但仍有唔少經驗豐富嘅外流球員在陣，實力依然強勁。相反伊拉克正處於換血期，更有主力射手兼隊長嘅尤尼斯缺陣，球隊實力大打折扣下，今仗難望對「東洋武士」構成威脅，阿謙捧讓球主勝。（有線61及201台周四晚上6時直播）

本田香川長友助陣
日本今次點兵未有重召巴素利前鋒柿谷曜一朗，而大阪飛腳中場遠藤保仁同史浩克04右閘內田篤人則因傷未有入選。不過，日本陣中仍有AC米蘭中場本田圭佑、緬恩斯前鋒岡崎慎司、多蒙特中場香川真司、國際米蘭左閘長友佑都等一眾經驗豐富嘅外流員，實力可以話係有增無減。至於已落實轉會緬恩斯嘅FC東京前鋒武藤嘉紀同樣能夠出戰，今仗有望喺對手身上取得入球。

伊拉克目前正處於新舊交接期，部分昔日主力都冇入選，影響最大嘅當然係作為隊長、踢緊本土球隊埃爾比勒嘅射手尤尼斯缺陣。伊拉克陣中雖仍有幾名外流球員，好似哥倫布機員前鋒祖斯甸美蘭、奧雷布洛中場阿密特耶仙同史雲頓中場耶沙卡斯米，但球隊實力遠遠不如今仗對手日本，今仗相信難敵「東洋武士」嘅攻擊，阿謙睇好日本可輕取伊拉克，捧讓球主勝。