亨格比利：巴西U20超班圍剿烏拉圭

曼聯、皇馬力量孭起巴西U20！世青盃奪標熱門巴西，喺分組賽輕鬆突圍，陣中攻擊孖寶包括「紅魔鬼」攻擊中場安達斯彭利拿，以及「艦隊」翼鋒真恩卡路士超晒班，今日晏晝對住見晒底嘅烏拉圭U20當然可以秤先，捧1.7倍主W撐巴西入8強！

（開賽時間：周四下午3:30）

巴西喺E組3戰全勝殺入16強，頂替加路掌舵嘅新帥米卡利崇尚進攻，球迷睇得過癮，最重要係班「森巴小將」有得發揮，當中以安達斯彭利拿同真恩卡路士嘅表現最搶鏡。

彭利拿 卡路士夠搶鏡
今季當選曼聯U21年度最佳球員嘅安達斯彭利拿連續兩場有波入，皇馬U19翼鋒真恩卡路士喺國家隊轉型做箭頭亦交足貨，由佢兩個衝鋒陷陣，邊使愁冇波入吖！加埋兩位中後場球員加比爾捷西斯同祖拿夫馬隆尼刑滿復出，巴西今鋪有前又有後喎。

對家烏拉圭喺D組分組賽錄勝和負各一戰績，當中對住實力麻麻嘅墨西哥都要輸波，最後僅靠抽籤先至力壓馬里獲次名出線資格，戰鬥力見晒底，邊會係巴西手腳吖！