走肖：智利強陣誓響頭炮

美洲盃聽朝開騷！
第44屆美洲國家盃聽朝揭幕，東道主智利喺主場對厄瓜多爾，不如吼有啲分頭嘅2.4倍「讓球主勝」。雖然智利王牌阿歷斯山齊士被人話係自私精，但正因為咁，佢更加有需要入波挽回形象，加上厄瓜多爾陣容殘缺，始終都係信A山最明「智」。

（now681台周五早上7:30直播）

智利日前喺熱身賽以1:0砌低薩爾瓦多，表現唔算特別好，阿仙奴王牌阿歷斯山齊士同漢堡中場馬些路戴亞斯，更被爆喺比賽中鬧交，幾乎講手開拖，需要隊友勸開佢哋先平息到件事。

維達爾搵工騷哥利
事後A山嘗試淡化事件，話大家只係一啲小拗撬，正因為大家鬥心爆棚，對勝負勁執着，所以先會有呢啲情況出現喎。之不過，以佢嘅性格嚟計，佢畀隊友鬧係自私精，肯定唔會聽完就算，今場一定更搏命！

厄瓜多爾3主力打柴
咁講真，數據真係呃唔到人，A山其實除咗識入波，助攻數字都好得人驚，只要佢調整好心情，智利根本唔憂冇波入。仲有，祖雲達斯中場維達爾應付完歐聯決賽後，已經歸隊可以候命上陣，意味智利實力會更加強，加上佢有興趣過檔阿仙奴同A山拍住上，今場係「騷哥利」、博轉會嘅最好餐士！

對家厄瓜多爾日前喺熱身賽以4:0打沉巴拿馬，但大家都知，佢哋離開高原主場慣性腳軟，今次仲有愛斯賓奴射手卡些度、CF阿美利加中場米高阿羅約同曼聯翼鋒路爾斯華倫西亞因傷唔能夠隨隊，齋靠韋斯咸前鋒安拿華倫西亞同史雲斯中場謝法臣蒙迪路數胡，唔似惡得出樣！睇埋佢哋條防線，基本上除咗踢屈福特嘅桑柏利迪斯，其餘全部都只係喺本土聯賽搵食，質素有限，點頂到智利強攻呀？

Data King：智利例入8強
智利近5屆有4次至少躋身8強。

智利近6場美洲國家盃分組賽有3勝2和1負。

厄瓜多爾連續5屆分組賽出局。

乜都玩錦囊：A山有鬥心博開首球
睇番智利個陣容，中場人腳的確唔錯，不過講到尾，臨門一腳多數會由阿歷斯山齊士去完成，既然佢喺熱身賽都話要同隊友爭波射，鬥心強到咁，今場肯定搏命，如果大家覺得厄瓜多爾都係捱打居多，不妨考慮A山首名入球啦！