雷法爾：美國哥倫比亞U20前鋒死火鬥獻「細」

經過分組賽3輪廝殺後，世青盃16強名單終於出爐，美國U20同哥倫比亞U20今日晏晝會上演「美洲內戰」。表面上睇美國喺分組賽攻入6粒火力唔錯，但實情佢哋淨係識恰弱旅，呢次撞正唔算多產嘅哥倫比亞，相信幾難多波入，1.78倍入球細諗得過。（開賽時間：周三下午3:30）

射手拖爾提早玩完
驟眼睇美國3戰入6粒好似好威咁，之不過佢哋喺A組有緬甸同新西蘭兩支弱旅幫手省靚數據，實在不宜過分高估。佢哋喺上仗對住烏克蘭毫無還擊之力直輸0:3，更證明之前只係虛火，不足為信，加埋射手拖爾受重創提早玩完，火力只會進一步受損。

同樣以次名出線喺哥倫比亞鋒力一樣唔多掂，首戰對住C組最弱嘅卡塔爾只能小勝1:0經已令人大跌眼鏡，第2仗亦只能靠12碼逼和塞內加爾，最後鬥葡萄牙甚至輸到3球後先破到蛋，就算呢鋪佢哋肯擺大個頭嚟攻都唔慌特別有效。況且賽前教練列斯查普暗示要提高球員心理質素，但嚟到淘汰賽班球員邊敢豁出去鬥攻吖，一場悶局睇怕都走唔甩囉。