Mic少：烏克蘭炸散塞內加爾

世青盃今日展開16強大戰，烏克蘭U20對塞內加爾U20最有睇頭！烏克蘭中場高維蘭高極速冒起，成為暫時最搶眼新星，3戰轟入5球被譽為「新核彈頭」，有佢助陣烏軍入波能力令人充滿信心。塞內加爾僅憑小組最佳第3名晉級，受讓都冇着數。烏克蘭U20小讓平半，要上盤。

（周三下午3時30分開賽）

世青盃一向係球星搖籃，今屆超新星來自烏克蘭嘅高維蘭高，呢位19歲進攻中場出身於薩克達青訓系統，已獲提升上一隊比賽，難怪能夠喺同齡球員中鶴立雞群。高維蘭高除咗擁有東歐球員速度快嘅優良傳統外，埋門一腳亦好出眾，分組賽對緬甸梅開二度，上仗鬥美國更大演帽子戲法。05年美斯及07年阿古路都只係以6球獲得世青盃神射手，高維蘭高現時已有5球進帳，足見其超卓數胡能力。

烏克蘭唔只攻力強，防守亦穩健，係唯一未失過波嘅球隊，名副其實攻守兼備。反觀塞內加爾3場分組賽只係險勝過同組最弱卡塔爾，以其中1隊小組最佳第3名打入16強，成績欠說服力，今次睇怕冇運行。

美國有料受讓超筍
同時間另一場美國U20對哥倫比亞U20，美國青訓愈來愈成熟，今次大軍之中有唔少球員已去歐洲搵食，包括効力富咸嘅隊長軒特文及阿仙奴中場施拉林。美國連贏首兩場分組賽，提早取得出線權，上仗輸畀烏克蘭似係留力，今仗出真功夫唔怕哥倫比亞，美國受讓半一必捧下盤。