卡爾萬：阿仙奴歎侯城私房菜

今輪英超壓軸戲碼，阿仙奴將會造訪侯城，「兵工廠」領隊雲格自從回收高基連後戰績大爆發，無論贏波率抑或入球率都贏晒車路士同曼城兩大班霸，況且「教授」話明要以亞軍過終點，今場作客對住呢道「私房菜」，要開出1.58倍客勝話咁易啦！

（now621台周二凌晨3:00直播）

自從雲格於舊年底喺查爾頓回收高基連後，阿仙奴近18戰聯賽拎到14勝2和2負，贏波場數較同期嘅車路士同曼城多不特止，仲狂轟39粒，火力亦更勝呢對榜首雙雄。其中近8場有7球進帳嘅基奧特，繼續聯袂阿歷斯山齊士、奧斯爾等進攻好手落場數胡，就算迪保治受傷未必踢得，其右閘位置都有近期英超大紅人比利連頂檔，今場撕破侯城防線真係易過食菜。

侯城主場3戰廠仔輸晒
另邊廂嘅侯城連贏兩場後，暫時逃離降班漩渦，教頭布魯士賽前話要砌低埋阿仙奴，搶分進一步確保英超席位。「老虎」贏波決心係夠嘅，弊在佢哋遇強例變「病貓」，今季主場對住「一哥」車路士同「二哥」曼城，兩場輸晒勁失7球，今場迎戰火力更強嘅「兵工廠」真係信唔過，更何況呢班波喺英超史上3次主場鬥阿仙奴亦全部落敗，睇怕今場都係難逃輸波命運咯。