法達斯維：阿仙奴發惡劏老虎

廠仔爭位 教授「幸福的煩惱」
今輪英超壓軸好戲，力爭亞軍嘅阿仙奴作客尾五嘅「老虎」侯城。由於阿仙奴傷疲盡起，甚至出現人滿之患，主帥雲格排陣時亦樂於面對「幸福的煩惱」，堅餓波嘅韋舒亞、禾確特、基蘭基比斯等若想離開冷板櫈，就要騷哥利氹「教授」，個個都咁搏，「老虎」就算仲要為護級拚搏亦好難頂得住，簡單捧阿仙奴客W。

（now 621周二凌晨3時直播）

阿仙奴球迷對於愛隊長期高踞「傷兵榜」一哥，早已習以為常，十個八個「入廠」更係見怪不怪，查實今季季初情況冇乜改善，但踏入季中衝刺期，大批傷兵如基奧特、奧斯爾、艾朗藍斯等陸續康復，一度締造聯賽八連勝佳績，證明主帥雲格冇喺冬窗亂咁買人係有道理。現時阿仙奴只得右閘迪保治未好番，睇吓佢哋嘅中前場，唔計奧斯爾等踢開正選嗰幾個，韋舒亞、禾確特、法米尼、路斯基、韋碧克喺冷板櫈等到頸都長，隨住左閘蒙利爾愈踢愈好，令基蘭基比斯淪為後備，咁多人爭位踢，對雲格嚟講係「幸福的煩惱」，預計「教授」會Keep住呢種良性競爭氣氛，今仗會畀機會部分後備落場操吓，順便考察佢哋狀態，無論為阿仙奴爭亞軍定係為自己，呢班「餓波鬼」仲唔搶韁爭取表現咩？

侯城留力對般尼「六分波」
當然尾五嘅侯城亦要為護級搶分，上仗更力克利物浦擸晒三分，戰意唔使懷疑。「老虎」踢法粗枝大葉，硬撼硬絕對未驚過，但面對阿仙奴呢類「技術流」球隊總係蝕章，佢哋對上三次喺自己地頭出戰兵工廠全敗，勁有格食格味道，今仗仲有中堅居迪斯戴維斯同前鋒謝拉域缺陣，實力受削，而且下仗對護級勁敵般尼，寧願博嗰場「六分波」好過喇，相信阿仙奴可輕鬆取勝，客W有1.58倍咪嫌少。